گؤزل قوجالیرسا...

او، گلدی، باخیشلار
   غملی، پریشان.
باخدیم، اۆرگیمده سوسدو فریادیم.
اونو یوخو کیمی گؤردوم بو آخشام،
فقط گؤردوگومه من اینانمادیم!

ساچلار آغ خیالدی
   چینی اوزونو،
اۆزونده قؽریشلار ناخیش-ناخیشدی.
آنجاق گؤزلریندن تانیدیم اونو،
حیات تک گؤزلره توخونمامیشدی.

گۆنلر ایله دؤنوب
   صف-صف دۆزلدی،
سانکی گۆنش دوغدو اوزاق سحردن.
اوندا او، گؤزلدی، نئجه گؤزلدی،
ائله بیل گلمیشدی افسانه‌لردن.

بیر دۆنیا یاشاردی
   محرم سسینده،
هر گؤروش — بؤیوک بیر احتیاج کیمی،
او ائله آدلاردی یئر کۆره‌سینده
گۆنش باشی اۆستده زرلی تاج کیمی!

دالغالار اؤنونده
   کؤرپه قوزویدو،
گؤزله وورولان سمادی، یئردی.
سانکی او پارلایان دان اولدوزویدو،
گلن سحرلردن مۆفده وئرردی.

گؤزللیک ان اولو بیر حقیقتدیر،
اۆرک حقیقته حسرت دئییلمی؟
گؤزل دوغولارسا — بو سعادتدیر،
گؤزل قوجالیرسا — دهشت دئییلمی؟

او، ایندی ائله بیل سسسیز هارایدیر،
قوی اسسین اۆستوندن عطیرلی یئللر،
آخی گؤزللرین جامالی آیدیر،
آیا نئجه قؽیدی رحمسیز ایللر؟

طبیعت!
   سن بیزه دوغما، عزیزسن!
سؤیله دوغرودانمی عدالتسیزسن؟

مگر سن اسدیکجه
   واختسیز کۆلکله،
آرزویا چاتیرسان اولو طبیعت؟
آخی گؤزللیگه قصد ائله‌مکله،
گۆناها باتیرسان اولو طبیعت!
مؤعجوزه یارات کی،
   تانری، جاهاندا،
گؤزل گؤزل قالسین قوجالاندا دا.

30-31 دئکابر ۱۹۹۶