بیر توپا قارا بولودو قووور کۆلک،
بلکه هارداسا یاغیشی گؤزلهین وار.
اۆمیدی داملالاردان آسیلی.
گؤزلهین وار عادی کۆسولولوگون
غئیر-عادی باریشیغینی،
احتیاطسیزلیقدان ایتیریلمیش گؤزلرین
هاچانسا تاپیلاجاغی ایشیغینی...
ساحیلده ایستیدن قوورولان داشلار
گؤزلهییرلر دنیزین قاباراجیغینی.
تورپاق حسرتلی توخوملار وار
کۆلگی گؤزلهییرلر،
گؤرهسن کۆلک اونلاری آپاراجاقمی؟!
کیمینسه قوللاریندا قالیب
بارماقلاریمین ناخیشی؛
گؤزلرینده پئشیمانچیلیق یاغیشی
او دا گؤزلهییر...
چوخداندیر اوت باسمیش
قبریستان یولو دا،
بیر خاطیره کیمی
کیمینسه
دیریلیب قاییداجاغینی گؤزلهییر،
گۆنلر قاتار کیمی کئچیر،
خاطیرهلر ال ائدیر پنجرهلردن.
مؤعجوزه گؤزلهییریک
آچیلان سحرلردن.
واختی سو کیمی ایچیریک،
گؤزلهیه-گؤزلهیه حیاتا
بیر آددیم گئجیکیریک...