قار یاغیب شاختا دۆشوب

دجل‌لر قؽزلارا قارداشا دؤنوب
یؽخیلانا گۆلمور،
دورانا گۆلمور.
ائله برکی‌ییب کی، قار داشا دؤنوب.
دجل اوغلانلارین ایپک قؽزلارا
قارتوپو وورماغا اللری گلمیر.

بیر شیشمان اؤزوندن راضیلیق نئجه،
وارلیغی ایتیبدیر خزلر ایچینده.
بوخار ماشینیدیر،
سانکی، ایندیجه
فیت وئریب ایته‌جک یۆزلر ایچینده.

گؤره‌سن بو شاختا نه واخت چکیلر؟
سویوقلوق اۆشودور اولدوزلاری دا.
چییینلر اۆستونده گزیر تۆلکولر،
باشا چؽخاریبلار قوندوزلاری دا.

دونوبدور اۆزونده بیج بیر تبسّوم،
باشلاردا راحاتلیق تاپار بو تۆلکو.
اوجا چپرلری مۆغنّی خوروز بوراخسا
سؽچراییب هاوادا قاپار بو تۆلکو.

گؤتوروب آپارار تنبل‌لیگینی،
ماغارا کۆنجونه آییلار کؤچر.
هاوادان آلاندا کاباب اییینی
جاناوار کؤنلوندن قوزولار کئچر…

ایندی قویونلار دا قازدان آییقدی،
بوزارمیش دؤورانلار یازیقدی دئییم،
قاییت، اووچو قارداش،
بئله سویوقدا
ائو یؽخیب، قان تؤکمک اینصافدان دئییل.
قاییت، ناهار ائله له‌له-گۆله‌دن،
کابابسیز کئچینسن دۆنیا داغیلماز.
ائله سویوقدور کی،
ایستی لۆله‌دن
گۆلله‌نین چؽخماغا هوسی اولماز...

بیر باخ، نئجه تمیز، بیاض قار ائنیب،
دجل‌لر قؽزلارا قارداشا دؤنوب
یؽخیلانا گۆلمور،
دورانا گۆلمور...
ائله برکی‌ییب کی، قار داشا دؤنوب
دجل اوغلانلارین ایپک قؽزلارا
قارتوپو وورماغا اللری گلمیر...