من ائله بیلیردیم گئتدی سویوقلار،
داها بولودلار دا قار الهمزلر.
چمن ایلمهلرین گۆل ناخیشینی
داها شاختالار دا قارالامازلار.
سؽنار سویوقلوغون بوز گۆزگولری،
بوغلانا-بوغلانا اویانار تورپاق،
تومورجوق کؤینکدن چؽخاراق اۆرکک
کؤرپهتک گۆنشه بویلانار یارپاق...
اللری هاوادا قالیر آغاجلار،
یئنه ده سویوغا اسیر دۆشورلر.
اۆشوین تنگین گؤز یاشلارینی
یوخولو-یوخولو اوتلار ایچیرلر.
یئنه خؽسین-خؽسین آغلاییر بولود،
ائله هاواداجا دونور بو یاغیش.
پئشیمان باهارین کیرپیکلرینه
النیر بو یاغیش،
قونور بو یاغیش؛
گۆنش داغ دالیندان بیر بوی قالخمامیش
دئیهسن تزهدن قاییدیر بو قؽش...
هله چیچکلرین گؤزو یوخولو،
طبیعت یئنهمی یاتماق ایستهییر؟!
تلسیب بوی آتان سارماشیقلار دا
اوزانیب باهارا چاتماق ایستهییر.
درهلر یئنه ده قارلا دولودور،
یئنه آغ کۆرکونو گئییب یوخوشلار.
قاییدیب اؤز کؤهنه یووالارینا
اۆشویور آلدانمیش کؤچری قوشلار.
قورخولو-قورخولو سوسور مئشهلر،
آیی دابانیندا بیر شئی قالماییب.
آغاج چاتداغیندا،
زمی یولوندا
هله قاریشقالار سؽرالانماییب،
خزلله اؤرتولن بوزلو بولاق دا
ایتکین قوزو کیمی ملر قالیبدیر،
بولاق یادداشیندا، زمی یولوندا
گؤر اؤتن باهاردان نهلر قالیبدیر...
تاپدانماق ایستهییر جؽغیرلار، ایزلر،
یاشیللیق ایستهییر درهلر، دۆزلر...
بو سویوق، بو سازاق تانیشدیر، تانیش
دئیهسن تزهدن قاییدیر بو قؽش.
کۆکنارلار اوّلکی سۆکوتوندادیر،
ایینهیارپاقلییا یازین نه دادی؟!
ائنلییارپاقلینی فصیل آلدادیر
گؤیلره دیرنیب چینار فریادی
کینلی بیر اوشاغا دؤنوبدور گؤیلر،
یئنه دولو یاغیر قاش-قاباغیندان.
گۆناهسیز چیچکلر یئنه جان وئریر
دولو یاغیشینین-داشقالاغیندا…
هارداسا اؤرتولور تۆل پنجرهلر
دیبچک گۆللرینه سویوق دیمهسین.
باهاری گتیریب گۆل پنجرهلر،
چؤللرده کیمسهسیز گۆللر نئیلهسین؟!
طبیعت، بو سیرّی سن اؤزون دانیش:
دئیهسن تزهدن قاییدیر بو قؽش…