آغلایان تاپیلاجاق...

اونو تکرلرین آلتیندا گؤردوم، کسیلمیش قولو
اؤزوندن خئیلی آرالی ایدی.

فیکرین هاردایدی، قارداش،
داها قانلی دوداغین ترپنمز،
آچیق گؤزلرین قؽرپیلماز؛
سنی آغلایان تاپیلار،
عؤمور وئرن تاپیلماز...
یولون هارایدی قارداش،
یولون سندن آرالی.
کیمی بئله آختاریر
قولون سندن آرالی؟!
بو قوللارین اۆستونه
یئنه ساچلار سپیلر،
ساچلار بویو سۆزولوب
ایستی یاشلار سپیلر،
اؤزون بویدا مزاردا
قارا داشلار سپیلر...
قولون سندن آرالی
ائوه تلسدی بلکه.
سنه چاتماسین دئیه
او، قاتارا دیرنیب
یولونو کسدی بلکه.
بو، قاتار ظالیم قاتار
عؤمرونو کسمه‌میشدن
قولونو کسدی بلکه...
بو آخشام قاپینیزی
بو کسیک قول دؤیه‌جک،
سنین یوخلوغونو دا
بو کسیک قول دئیه‌جک.
کؤرپه‌لرین یئنه ده
قاپی‌یا یۆیوره‌جک،
سینه‌نی آختاراجاق،
قؽسیلا بیلمه‌یه‌جک.
بو کسیلمیش قولوندان
آسیلا بیلمه‌یه‌جک...
آ قارداش، اویان، اولماز،
قوللارینی گؤندرمه،
آ قارداش، دایان، اولماز!
یوخلوغونو دئمگه
کیمسه‌نین دیلی گلمز.
تک قولونو یوماغا
کیمسه‌نین الی گلمز.
بیر اۆزو قؽز گلینین
بیر داها اۆزو گۆلمز.
بلکه ده اود ایچینده
او، کؤنلو توخ گزه‌جک،
یوخوسونا گیرنلر
بیر قولو یوخ گله‌جک.
ساچینی اوخشاماغا
گؤز یاشینی یؽغماغا،
کدرینی بوغماغا.
بیر الی چاتمایاجاق،
سنه قوووشماق اۆچون
الینی اوزاداجاق
ایره‌لی،
چاتمایاجاق...
فیکرین هاردایدی، قارداش،
داها قانلی دوداغین ترپنمز،
آچیق گؤزلرین قؽرپیلماز،
سنی آغلایان تاپیلار،
عؤمور وئرن تاپیلماز...