او گئجه تور آتدیم دنیزه،
دنیز، گئجه،
خؽرداجا بالیقلار،
اولدوزلار
سۆزولدو توردان...
بیاض بیر سو پریسی چؽرپیندی
هؤرومچک تورونا دۆشموش
کپهنکتک.
چؽرپیندی، چؽرپیندی،
بومبوز لیباس گئیدی قوملاردان.
قؽردیم ایپک ساپلارین ایلمهسینی،
کسدیم لپهلرین سؤزونو، کلمهسینی
آلدیم سو پریسینی الیندن...
اؤپدوم ایپک ساچلارین
نملی شؽریملاریندان،
یاخین قوملار ائشیتدی پؽچیلتیلاریمیزی،
ایپک ساپلار کسه بیلمهدی آرامیزی،
یۆیوردو دالغالار،
سۆروندو لپهلر،
ازیلدی قوم تپهلر،
گؤولر اولدوز-اولدوز دئشیلدی،
ساحیل ائشیم-ائشیم ائشیلدی،
سونرا...
دالغالار پئشمان قاییتدی،
لپهلر یاتدی،
قوم تپهلر یاییلدی،
گؤیلر اولدوز-اولدوز سؤندو،
ساحیل لپیر-لپیر اۆتولندی...
دنیزه قاییتماق ایستهمهدی سو پریسی،
آداما چئوریلمیشدی قالان یاریسی؛
ساکیت-ساکیت باخیردی قؽزاران گؤیه،
بالیقلار لاپ یاخینا گلمیشدیلر،
قولاقلارینی آتمیشدیلار ساحیله
بیر شئی ائشیتسین دئیه...