روبوت حاقیندا دۆشونجه‌لر

اینسان قوردوغونو اوچورور آسان،
بیر کوما آختاریر آخیر سؽغینا.
ایتیریر اؤزونه اینامی اینسان،
قول اولور اؤزونون یاراتدیغینا.
صاباح اؤز تفکّور پایینی بلکه،
اینسان روبوتلارا تاپشیراجاقدیر.
دۆنیانین تکنیکا اویونو بلکه
بیر گۆن دنیزلری داشیراجاقدیر.
دۆشونسه،
اینسانا دیز چؤکه‌جکمی،
قوومازمی اینسانی یئر کۆره‌سیندن؟
اینسان یاخاسینی چکه‌جکدی‌می
بو دمیر اللرین منگنه‌‌سیندن؟!
بو دمیر دۆنیانین قانونو یئنی،
سیاست سۆرونور بیر کؤلگه کیمی.
سۆپوروب زاووددان آتیر فعله‌نی
روبوتلار دمیر بیر سۆپورگه کیمی.
دمیر اکه‌جکلر اونلار تورپاغا،
هر گۆلو، چیچگی سولدوراجاقلار.
یؽغیب اینسانلاری اوچان بوشقابا
گؤیلره سۆرگونه قالدیراجاقلار...
دۆنیانین جنگل‌لیک قانونو دا وار:
گۆجلو اؤز حؤکمویله یاشار مئشه‌ده.
روبوت دیزیمیزه باش قویوب یاتار،
جانی دا هارداسا گیزلی شۆشه‌ده...
نهنگ بینالاری بیر ائوجیک کیمی
روبوتا اویونجاق کوبلاری قوردوق.
بلکه دکوراتیو بیر کۆچوک کیمی
روبوت بالاسینا ایلنجه اولدوق.
اینسان قوردوغونو اوچورور آسان،
بیر کوما آختاریر آخیر، سؽغینا.
ایتیریر اؤزونه اینامی اینسان،
قول اولور اؤزونون یاراتدیغینا...