بو سحر نم دۆشموشدو گۆنشه،
شئهلی شفقلر آخیردی
گؤی اۆزوندن.
نملییدی دۆنیا
سویو تزهجه کسیلمیش آرخ کیمی،
کیمسه نغمه اوخویوردو
نملی دوداقلارییلا
سس ده نملییدی، نغمه ده.
آی ایشیغی کیمی ایلیق
بیر حیسّ دولدو قلبیمه،
نملی بارماقلاریم
آز قالیردی گۆل آچا؛
قوشلار چؽرپیردی
قانادلارینداکی هؤیوشو،
یئردن گؤیه اۆمید داملاسی اوچوردو،
نملی چمنله
بیر اوشاق قاچیردی
چهلیملر آچا-آچا.
یالین آیاقلاری اؤپوردو تورپاغی،
اۆرگی کؤکسونده
یامیاشیل اۆزوم یارپاغی...
بو سحر شئه دۆشموشدو گۆنشه،
بولودلار دسمال کیمی
قوروتماق ایستهییردی گۆنشی.
نملییدی اؤزلری ده.
شئه گؤردوم چیچکلرین گؤزلرینده،
دولو بیر قدحه دؤنموشدو لاله،
سارالا-سارالا سؤنموشدو نرگیز.
گؤزو یاشلییدی دۆنیانین،
چای داشلاری
تزه کسیلمیش اۆرک کیمی بوغلانیردی.
هر شئهده بیر گۆنش یانیردی،
نملییدی گۆنش!