گۆنشه یۆیورن اوشاغین
تیکان باتاجاق آیاغی یالین،
اود یاندیراجاق اللری یالین.
یۆیورور آرزو جؽغیرییلا
بؤیوکلر، موغایات اولون!...
گۆنشه یۆیورن اوشاغین
قلبیندن گؤیلر کئچیر.
اوشاق گؤیلردن کئچمک ایستهییر.
سؽخیب بولودلاری درهلره
دویونجا ایچمک ایستهییر.
گؤتوروب آی اوراغینی
قارا-قارا بولودلاری
بیچمک ایستهییر.
گۆنشه یۆیورن بو اوشاق
گۆنشه کؤچمک ایستهییر.
گۆنشه یۆیورن اوشاغین
الینده کپهنک توزو،
ایزینده قاریشقا اؤلوسو،
گؤزونده خودافرین کؤرپوسو...
نردیوان قویاجاق یوللارا،
کؤرپو قویاجاق چایلارا،
گؤیچهدن آرازا،
آرازدان بورچالییا!...
آلین بو اوشاغی آرایا،
آرزوسو گۆجوندن بؤیوک
اۆرگی ایچیندن بؤیوک،
آددیم آتماق ایستهییر،
آددیمی قؽچیندان بؤیوک...
گۆنشه یۆیورن اوشاغین
اۆزو یوخوشا دوغرو؛
بو بیر پارچا اوشاغین
کؤرپه قلبینده آغری.
یا گۆنشه چاتاجاق،
یا پارتلایاجاق باغری...
هله کی، گۆنشه یۆیورور
تیکان باتاجاق،
آیاغی یالین.
اود یاندیراجاق،
اللری یالین،
بؤیوکلر، بو اوشاقدان
موغایات اولون!..