سادهلؤوح اۆرک کیمی
آچیلار یاخشییا دا، یامانا دا،
جبههدن گلن
شیکست عسگره بنزر،
تردّود ایچینده
بیر قؽچی اۆستونده
دۆشونور آستانادا
کۆچهیه آچیلان قاپی...
کۆلکلی هاوالاردا
چؽرپیلار اؤزونه، -
اینلهیر ایچین-ایچین،
حاصار اولار چرچیوهلر سؤزونه...
اؤزونه چؽرپیلار سیللهسی،
باغلانار قارانلیغا،
آچیق یولو - یئر کۆرهسی!
بیر ائوین سؤزلو دوداغیدیر،
قووولموش کیرایهچییه
گؤز داغیدیر،
گؤز دوستاغیدیر
کۆچهیه آچیلان قاپی...
آتا یوردونون «واغزالی»یا یئللنن
سونونجو تاختا ائلی؛
پئشمان قاییدان گلینه
ایلک همدم، ایلک تسلّی
کۆچهیه آچیلان قاپی...
… کۆچهیه آچیلان قاپی کیمیدیر اۆرگیم،
دجللرین تباشیر یازیسی.
چۆروین میسمارلارا
عوض اولان تزهسی.
قؽشقیریقلی گۆندوزو،
پؽچیلتیلی گئجهسی،
اۆستونه بانلایان
بئچهسی، جۆجهسی...
نهیی دئسن وار.
ائل یولو،
کاروان یولو،
ترسلرین آواند یولو،
ایمضاسیز ساپاند یولو،
یالانچیلارین عاید یولو
اۆرگیم -
کۆچهیه
آچیلان
قاپی...