آلنیندان اؤپدوکلریم

... حیطده‌کی سئوینجیمدن
چاغیردیلار منی

«یاتمیش» عمی‌مین
یانینا گتیردیلر،
- آلنیندان اؤپ، - دئدیلر...

ساری بیر سویوقلوغا
توخوندو دوداقلاریم؛
سونرا یاریمچیق سئوینجیمه
تلسدی آیاقلاریم...
هر آخشام قارالان گۆنون
آلنیندان اؤپدو گؤزلریم،
آلنیندان اؤپدوکلریم
بیر ده دؤنمه‌دی گئری...

گؤزلرینده یاش،
اۆرگینده غم،
بیر سحر
بازارا گئدن اینگیمیزین
آلنیندان اؤپدو ننه‌م؛
او گۆندن
بادیامیزدا کؤپوکلنمه‌دی سۆد،
قاپیمیزدا گؤرونمه‌دی چیچک،
دئیه‌سن بازارا گئدنده
بادیامیزین آلنیندان
اؤپموشدو اینک...
اۆمیدی باغلادیق
قاپیمیزداکی چاتیمیزا،
اون ایل سونرا
آلدیغیمیز اینگی ده
گؤزلری دولموش بیر قاری
آلنیندان اؤپوب ساتدی بیزه.
* * *
بیر گۆن بابامین آلنیندان اؤپدوک،
اوّل ننه‌م، سونرا من؛
بیر گۆن ده ننه‌مین آلنیندان اؤپدوک،
اوّل آنام، سونرا من؛
سونرا آنامین آلنیندان اؤپدوک،
اوّل اؤلوم، سونرا من...
* * *
یولوما چؽخان یاخشیلارین
گؤزوندن اؤپدوم،
تسلّی دولو
سؤزوندن اؤپدوم.
یامانلارین آلنینا باخا-باخا
قالدی گؤزلریم،
اۆرگیمده یوخولادی
آلنیندان اؤپدوگوم سؤزلریم...
***
آلیندان اؤپمگه قورخورام،
اللریندن اؤپورم
اوغلونون آلنیندان اؤپموش مکتوبو
قوینوندا گزدیرن آنالارین،
اۆزوندن اؤپورم،
آیاقلاری مکتب پیلله‌لرینی
اؤپن بالالارین،
دوداقلاریندان اؤپورم
اۆرگه یاخینلارین...