۳ مارت ۱۹۸۵

یاسیندا آغلایا بیلمه‌دیم، آنا،
بوشالدا بیلمه‌دیم
داشلی اۆرگیمین آغری‌سینی.
دئیه بیلمه‌دیم
آیریلیغین آجیسینی؛
حسرتله سۆزدوم
ساچلارینی یولانلاری،
گؤزلری دولانلاری.
اوغول کیمی یوخ،
قونشولار کیمی ده
آغلایا بیلمه‌دیم باری...

ائله بیل منی آغلاییردیلار،
هامی اۆزومه باخیردی
گؤزلرینی سؽخا-سؽخا،
اونلار نه بیله‌یدیلر
من چوخدان آغلامیشام
یالقیز آناسیزلیغا...

گؤزلریمی قورو گؤروب
اۆرک-دیرک وئرمه‌دیلر،
کؤکسومده قؽرخ ایل
«آنا» دئییب آغلایان
اۆرگیمی گؤرمه‌دیلر...

آنا شریکی اولدوغوم قارداشلاریم دا
دردلرینی بؤلمه‌دیلر.
بؤلونمه‌لی نه‌ییمیز واردی؟
اولانمیزی دا –
آنانیمیزی دا
تابوتا قویوب
اؤلوم آپاردی...
... بو یازین ایلک سحری
اکینه باشلامیشدی ائل-اوبا،
گۆنش ایسیندیکجه
سویویوردو ائولرده‌کی سوبا.
توخوم سپیردیلر تارلایا،
شیتیل اکیردیلر باغا،
بیزسه قول-بوداق آتاندان سونرا
کؤکوموزو قویدوق تورپاغا.
داها بوینونو قوجاقلاماغا
الیمیز چاتمایاجاق،
اۆستونده بیر داش گؤیردی
قول-بوداق آتمایاجاق...