منی سؽندیرمایین

کیچیکلری بؤیودوب گؤستریرم،
بؤیوکلری اۆیودوب گؤستریرم.
اینانین کی، دۆزو دۆز گؤستریرم،
سؽندیرماغا چالیشمایین سیز منی.

حقیقته پنجره شۆشه‌سی‌یم،
قلپه‌لنسم مین یئره دۆشه‌سی‌یم.
سؽندیرانین گؤزونو دئشه‌سی‌یم،
سؽندیرماغا چالیشمایین سیز منی.

عئینک اۆچون بیچین، کسین، بؤلون سیز،
گؤزونوزه منی عئینک بیلین سیز.
تور گؤرنده گؤزونوزو سیلین سیز،
سؽندیرماغا چالیشمایین سیز منی.

یاشیم هله طالعییمین دان اۆزو،
بیر بوز کیمی باغلامیشام دنیزی.
سؽندیرسانیز باتیرارام من سیزی،
سؽندیرماغا چالیشمایین سیز منی.
گۆله-گۆله دؤیولندن چکینین،
«بلی» دئییب، اییلندن چکینین.
پالتار کیمی گئییلندن چکینین،
سؽندیرماغا چالیشمایین سیز منی.

نه گؤرموشم، عؤمور یاری، گۆن یاری،
جیلوولایین بو یئرسیز عصبلری.
ال ساخلایین، ای وۆقار قصّابلاری،
سؽندیرماغا چالیشمایین سیز منی.