زامان – واختین آخینی،
اوزاق ائتمه یاخینی،
گؤرمهدیگی یوخونو
او قدر یوزان وار کی!
قوچ بیلیب قوزوسونو،
گیزلدیب روزوسونو،
اؤزگهنین یازیسینی
او قدر پوزان وار کی!
اۆمید – اوزاق بیر چؽراق،
عؤمور یازین بیر واراق.
آیاغین آلتینا باخ،
او قدر قازان وار کی!
کامان ساخلامیر اوخو،
چیچک گؤزونده قورخو.
گۆللر نئیلهسین آخی،
او قدر اۆزن وار کی!
سن ساخلا گؤزونو توخ،
سؽندیرما اؤزونو چوخ.
آجلیغا دؤزومون یوخ،
او قدر دؤزن وار کی!
شئیطان بیجلیگی پولدا،
دووشان قورخوسو کولدا،
ازبر بیلدیگی یولدا
او قدر آزان وار کی!
آغلاما ایچین-ایچین،
آیریل ایچیندن کؤچون.
حقیقت گزن اۆچون
او قدر دۆزن وار کی!..