زامانی دوئله چاغیریرام من...
مقصدسیز دۆشنده یولون آغینا؛
واختی بیر توم کیمی چؽرتلایاندا من؛
قؽشقیریب زامانین کار قولاغینا
تکبهتک بیر دؤیوش کئچیر قلبیمدن...
بو آسفالت یوللارین اۆتو هاماری
آخیر بیر چای کیمی آیاغیم آلتدان.
بو واختی یولوندان قویایدیم باری،
بیکار واختلاریمی دۆشوروب آتدان
بیر آغاج وئرهیدیم تورپاغا، اکه،
بیر کند گؤسترهیدیم اونا سو چکه...
باشیمین اۆستونده شیمشکتک چاخیر
ساعت عقربینین قؽلینج دؤیوشو.
دایانیب تینلردن حسرتله باخیر
ماشین قضاسینین بیر تونج دؤیوشو...
قؽرمیزی گؤزلری ایشیقفورلارین
منه «دایان!» دئییب امرینی وئریر.
بیر ده نه وئجینه ایشیقفورلارین
کیم نئجه گؤزلهییر، عؤمرونو وئریر،
قؽشقیرا بیلمیرم ایشیغین اۆسته،
بو سؤز آنلامایان اوشاغین اۆسته،
یانیمدان «تعجیلی واردیم»لار کئچیر،
نؤمرهسی خۆصوصی ماشینلار کئچیر،
منسه گؤزلهییرم...
زامان گؤزلهمیر،
خۆصوصی نؤمرهیله قایدا پوزانا
باخیب ال ائیلهییر،
میلیس سؤز دئمیر.
سوسوز تورپاق کیمی جادار قلبیمه
نه قدر تسلّی یاغدیریرام من.
یوخ!
محل قویماییب داها هئچ کیمه
زامانی دوئله چاغیریرام من!
یالان محبّتله «باخت گۆلدورمکدن»
اوساندیم من داها،
بئزیکدیم داها.
گؤروش یئرلرینده واخت اؤلدورمکدن
اصل محبّته گئجیکدیم داها...
گئرییه قاییتماق آسان ایش دئییل،
چؽخدیغیم پیللهلر اوچولوب گئدیب.
زامانا من نئجه آتدان دۆش دئییم،
جیلووو الیمدن آچیلیب گئدیب.
واخت اوچوب سیقارِت تۆستولرینده،
واخت اوچوب چارپایی ایستیلرینده؛
دولدوروب قدحه ایچمیشم واختی،
من نه گؤزلهییرم بو غۆروب واختی؟!
کدر - قبیریستاندان،
گۆلوش - شئیطاندان
دویغو قورومادیم بیر آن یانماغا،
من ایتیرمیشم.
داهی فوتبولچولار یاشیل مئیداندان
توپو چؽخاریبلار واخت قازانماغا،
من ایتیرمیشم.
بیر گۆنلوک،
بیر آنلیق خئییرلریمین
عؤمرومده ایلنجه ماراغی قالیب.
یازا بیلمهدیگیم شعرلریمین
آغ بایراق قالدیران واراغی قالیب.
بلکه بو گئجهنین صاباحی یوخدور،
یوخو - چوخمعنالی بیر بیلمهجهدیر،
کیم قالا.
کیم گؤره، بو باختاباختدیر،
خاطیره - بولانمیش بیر گؤلمهچهدیر..
او سودان سوسوز دا ایچمهیهجکدیر،
گۆمان وار،
بیر سحر دورولدو بلکه.
عؤمرومدن اوزانان تاختا کؤرپولر
قؽریلیب تزهدن قورولدو بلکه...
ایچیمده بیر توفان چاغلاییر منیم،
یئنه اؤز ایچیمده بوغولورام من.
آخیرینجی شامعیم آغلاییر منیم،
زامانی دوئله چاغیریرام من...