شیمشکدن قانادا آل،
یولون اوزاقدی،
هله نئیلهمیسن،
عؤمور یاریدی.
سنی گئدهجگین سون منزیله ده
شعرین قانادیندا آپارمالیدی...
آرخایین سالماسین قوی شؤهرت سنی،-
چؤرک دوستو کیمی اۆزودؤنوکدور.
حیات یار دئییل کی، پؽچیلدایاسان،
گرک قؽشقیراسان،
دۆنیا بؤیوکدور.
هله اوزاقلارا چاتماییر سسین،
دۆنیانین کی، سندن خبری یوخدور.
آددیمین دایانسا،
بیر نغمه اوخو،
یاخشی کی، نغمهنین چپری یوخدور...
هر گۆنون سونوندا گئجه گؤرونور،
یاندیر اۆرگینی یول آزمایاسان،
آرخانجا قارا بیر کؤلگه سۆرونور،
چالیش کؤلگهنله ده گۆل ازمهیهسن.
یوخو عؤمروموزه راحت بیر قفس؛
سن ایسه باشینین آلتینا داش قوی.
حسدین، غیبطهنین کندیرینی کس،
قلبینده پاخیللیق یئرینی بوش قوی!...
زیروهدن آشاغی داش دا یۆیورور،
اگر باجاریرسان زیروهیه تلس،
تلس، آ دوستوم، تلس!...
ایللرین آمانسیز سؽناغی اولور،
بوش کئچن گۆنلره الیمیز چاتمیر.
ایلهام دئدیگیمیز دولو تۆفنگدیر،
ائله کی، پاس توتدو،
آتمیر کی، آتمیر،...
کؤهنه سئوگیلر ده هارایا گلمز،
اوزاق خاطیرهلر ایسیتمز سنی.
باشینی غفیل بیر دومان بۆرویر
بوز توتان بولاقلار ایچیرتمز سنی...
بلکه او گۆنلری گؤره بیلمهدین،
نه چوخدور شهرده ماشین قضاسی،
دئمه کی، من گئتسم،
دۆنیا بوش قالار،
یئرینه تزهسی گلر، تزهسی.
هر کس اؤز یئرینه یاشار عؤمرونو
کیمیسی هۆنرله اؤنده یۆیورر،
کیمیسی یئدگه قوشار عؤمرونو.
اوزاق اول،
سن حاضیر سعادتلردن
عؤمرونو توفانلار قوینوندا کئچیر.
گۆنلر سوسوز گلن دوه کیمیدیر،
قوروموش دوداقلا عؤموردن ایچیر.
هله قلم توتور اللرین سنین،
هله گؤزلرینده دۆنیا یئنیدیر.
گۆنده بیر گؤروشون دار آغاجیندا
واختینی اؤلدورمه،
آمان گۆنودور!
سنی یولدا قویار اؤتری هوس،
هله کی، یول توتار آیاغین سنین
تلس، آ دوستوم، تلس!...