ایچیمدن غم ایلمهلی
اریش-آرغاج کئچیبدیر،
سئوینج یاریتوخ گلیب،
غم یاریآج کؤچوبدور،
سئل اولان گؤز یاشیمی
بیر احتیاج ایچیبدیر؛
تانیش اولاق، اوخوجوم،
تانیش اولاق: بو منم.
بلکه گؤیدن گلمیشم،
یئرده یئریم یوخ منیم،
نهییم وارسا دئییرم،
اؤزگه سیرّیم یوخ منیم.
بیر دفعه سویولموشام،
داها دریم یوخ منیم،
تانیش اولاق، اوخوجوم،
تانیش اولاق: بو منم.
اللریمی اوزادیب
گؤیلره کؤک آتیرام،
"شِش"ی نظرده توتوب
من شعر یازمیرام کی،
اۆرکدن یۆک آتیرام.
تانیش اولاق، اوخوجوم،
تانیش اولاق: بو منم.
ساکیت گؤرنده منی
قوزو قوچدو همیشه،
قوچ اولاندا قارشیمدان
قوزو قاچدی همیشه،
اۆرگیم دولودورسا،
جیبیم بوشدو همیشه،
تانیش اولاق، اوخوجوم،
تانیش اولاق: بو منم
عؤمروم گل-گئت مئیدانی،
دوست بازاری اوجوزدو،
نه قونماغیم قونماقدی،
نه اوچماغیم اوچوشدو.
عؤمور اودماق ایستهدیم،
گۆنلریمی اودوزدوم،
تانیش اولاق، اوخوجوم،
تانیش اولاق: بو منم
عئینک تاخدیم گؤزومه،
شۆشهسینی یوخ گؤردوم،
ایستی سؤز آرخاسیندا
اۆرگی سویوق گؤردوم.
یاتدیم کی، یوخو گؤرم؟!.
نه گؤردوم، اویاق گؤردوم،
تانیش اولاق، اوخوجوم،
تانیش اولاق: بو منم.
الیم کندیر آختاردی
ایینهسیز آغ ساپ گلدی،
آت ایستهدیم کۆمکه
بیر آتسیز آخساق گلدی.
بیر تپهیه سؤز دئدیم
اونا قاهمار داغ گلدی،
تانیش اولاق، اوخوجوم،
تانیش اولاق: بو منم.