منسیز قالاجاقدیر بو دۆنیا بیر گۆن
منسیز قالاجاقدیر بو دۆنیا بیر گۆن،
کیمینسه گؤزونه یاش گلهجکدیر،
منسیز قالاجاقدیر بو دۆنیا بیر گۆن،
بیر داش غملی-غملی دیکلهجکدیر.
دوداقدان گۆلوشتک سیلینر آدیم،
عؤمور - سونو گلن کئچیلن یولدو،
دۆنیا گلیشیمدن خبر توتمادی،
بلکه گئدیشیم ده خبرسیز اولدو.
کؤچوب گئدهجگم گۆنون بیرینده،
هیجران گؤیرهجک یئریمده منیم.
کیملرینسه گیزلی جیب دفترینده
اؤلهجک تلفون نؤمرهم ده منیم.
قارا چرچیوهدن باخاجاق شکلیم،
دونوق گؤزلریمده دالدالانار غم.
سینهمده دویغوتک یاتار اللریم،
اویادیب سون شعری یازا بیلمرم.
قارا داش دوغولار،
سویوق، من آددا؛
بیر قادین هؽچقیریب ساچینی یولار.
آیریلیب گئدرم،
تابوتوم آلتدا
دؤرد چیین گؤروشر.
دؤرد اۆرک وورار...
منیم چارپاییمدا سۆکوت اویویار،
آرتار بیر ساکینی قبریستانین دا.
بیر چیچک کؤکونو سینهمه قویار،
رنگی لچکلره کئچر قانین دا.
گلیب بو چیچگی درنیم اولماز،
باهار گؤیردهجک،
قؽش سولدوراجاق.
کیچیک بیر تپهده چیچکلر هر یاز
یورولموش چیینینده غم قالدیراجاق.
کؤچوب گئدهجگم دۆنیادان بیر گۆن،
بلکه یۆز ایل سونرا،
بلکه ده صاباح.
بلکه بؽر قو کیمی
چؽرپینیب بو گۆن
نغمه اوخویورام اؤلومدن قاباق...