سون سؤزون

گرک بو گۆنومو گؤره‌یدین اؤزون،
حسرتین یاش گلیب یاشیمین اۆسته.
بیر آج قاغایی‌یا دؤنوب سون سؤزون،
هرلنیر توفانلی باشیمین اۆسته.

بو سؤز دینجلیگیمه کسیلیب قنیم،
نه توپا بولوددور،
نه ده بیر الچیم.
ایلک سؤزون،
ایلک سئوگی دۆنیامدی منیم،
سنین سون سؤزونو من نئجه اؤلچوم؟

کیمی اؤز اودونا آلیشان گؤرسم،
آتیرام قلبیمی حسرت اودونا،
هاردا قاش‌قاباقلی بیر اوغلان گؤرسم،
سانیرام سون سؤزو دئییبلر اونا...

قلبیم اؤز سهوینه چوخمو یاناجاق،
نیه بس قدرینی بیلمه‌دیم اوندا؟!
آخیر قیمتینی تاپدیم من آنجاق،

سنی ایتیرمیشدیم اونو تاپاندا...
هر اۆرک بیر اوجاق،
هر اۆرک نغمه،
نغمه‌م آلیشیبدیر، تۆستولنیبدیر.
منه ائله گلیر هر کؤورک نغمه
سنین سون سؤزونه بسته‌لنیبدیر.

گئتدین...
بو گئدیشدن نه دۆشدو منه؟
نئچه لال هؽچقیریق گؤزلریمده‌دیر.
ایلک سؤزو دوداغیم دئمیشدی منه،
سون سؤزو یاشاران گؤزلرین دئدی.

ایندی محبّتیم حسرت دنیزی،
اوردا دالغالارین یاریشی باشلار.
توتولار گؤیلرین ماوی بنیزی
سونرا دا سون سؤزون یاغیشی باشلار...

قلبیم اؤز سهوینه چوخمو یاناجاق،
نیه بس قدرینی بیلمه‌دیم اوندا؟
آخیر قیمتینی تاپدیم من،
آنجاق،

سنی ایتیرمیشدیم اونو تاپاندا...