دایان، باهار چاغیم

گۆنلریم خاطیره ائوینه کؤچور.
گۆنلریم عؤمرومو سو کیمی ایچیر،
اری‌ییر گؤزومون شکیل یادداشی،
قلبیمده بیر سئودا آغری‌سی قالیر.
قارشیما چؽخانلار هر آددیم‌باشی
قایغی‌یا چئوریلیب قلبیمه دولور.
گۆلن سحرلرین غملی آخشامی
یئنه شامع یاندیریر مزار باشیندا.
دۆنیایا قوناق‌تک گلن اینسانین
دوغومو، اؤلومو مزار داشیندا.
چمن یاشیلینی، چیچک سِحرینی
داشلار کی، کؤکسونده یاشادا بیلمیر.
داشا عؤمور وئریب یاشادان اینسان
عادی بیر داش قدر یاشایا بیلمیر.
دییشه-دییشه فصیل‌لر اؤتور.
دییشه-دییشه نسیل‌لر اؤتور.
هر یاشیل یارپاغین سونو خزلسه،
ائله بو دۆنیادا باهار گؤزلسه،
دایان، باهار چاغیم، قؽشا تلسمه!
یوخوموز اؤلومون مشق ساعتیدیر،
هر گئجه گۆندوزون نقاراتیدیر.
بلکه بیر نغمه ده بس ایدی بیزه،
سون صدا اولاردی «قو» عؤمروموزه.
بو قدر حسرتلی نغمه‌لر اؤتوب
سۆکوتلا اؤلمگین نه معناسی وار؟
کؤهنه قبیرلردن تزه اوت بیتیب،
اوتون دا یاشاماق تمنّاسی وار!
ایچیب بولودلارین گؤز یاشلارینی
هله کی، بؤیویور قؽشدان خبرسیز
بئله‌جه بؤیوکدور بیر زامان بیز ده
بیزیمله یاتاجاق داشدان خبرسیز...
بویوموز قدرسه تورپاق پاییمیز،
نیه سرحد-سرحد بؤلدوک دۆنیانی؟
نئجه گؤرموشدوسه اجدادلاریمیز
بیز ده اونلار کیمی گؤردوک دۆنیانی.
گۆنش همین گۆنش،
آی همین آیدیر،
همین آداملاریق، گلمیشیک یئنه.
وئردیگی عؤمرونو آلاندان سونرا
داها نه وئره‌جک بو دۆنیا منه،
دایان، باهار چاغیم، قؽشا تلسمه!
بیلیرم زامانی ساخلاماق اولمور،
ساعتلار گۆنلری دوغراییر، بیچیر.
قؽزارا-قؽزارا گلن گۆنشین
آزالان اودونون آغریلاری دا
بلکه دان اۆزونون ایچیندن کئچیر؟!
دۆنیادا ابدی نه قالیر گؤرن،
بیز کی، ابدیات یولچولاری‌ییق.
گۆنلر دورنا کیمی اؤتوشور گئدیر.
زامان سۆرعتینه چاتماق اولمورسا.
دئمه‌لی، مۆقوّا اووچولاری‌ییق!
او قدر بورجوم وار آنا تورپاغا،
بورجلویام دردیگیم چیچگه، گۆله.
محبّت بورجومو دئمیرم هله،
بورجلویام دردیگیم چیچگه، گۆله.
آغاجا بورجلویام، داشا بورجلویام،
بیر کؤنول نغمه‌سی ائشیتمک اۆچون
قفسه سالدیغیم قوشا بورجلویام!
پیسلره نیفرتی اؤیردن دۆنیا،
زامانی شامع کیمی اریدن دۆنیا،
داها نه وئره‌جک، نه وئره‌جکسن؟
بورجلوقدان چؽخماغا مؤهلت وئر منه،
دویونجا باخماغا مؤهلت وئر منه.
قارشیمدا بو قدر داغ یارادیبسان
زیروه‌یه چاخماغا مؤهلت وئر منه!...