قار کیمی

قار کیمی آغ گلدیم،
لکه‌سیز گلدیم،
سس‌سیزجه یاغمیشدیم یوللارینا من.
من سنین عؤمرونه "بلکه"سیز گلدیم
یؽغیلدین گۆج کیمی قوللاریما سن...

بیتدی باخیشلارین نغمه‌سی، سؤزو،
سۆکوت قوللاریندا گزدیردی بیزی...
سویودوق قار کیمی...
نه دئییم،
دۆزو،
-بلکه بو سویوقلوق بئزدیردی بیزی...

ایندی خاطیره‌نله یاناجاغام من،
گۆلسن، گۆلوشونه بۆرونه‌جگم.
قار کیمی اووجونا یاغاجاغام من،
قار کیمی اووجوندا ارییه‌جگم!..

حسرتیم قلبیمده دینیر تار کیمی،
نغمه‌لر دنیزدیر، وۆصالین قاییق.
سن ده، آی سئوگیلیم،
گئتدین قار کیمی
قاییتسان،
قار کیمی لکه‌سیز قاییت!..