یاندیر مکتوبلاریمی...

هر سطیر اۆستونده تیتره‌ییب الیم.
سطیرلر قلبیمده اود آلیبدیلار.
من سنه بیر دفعه آلداندیم گۆلوم،
مکتوبلار عؤمورلوک آلدانیبدیرلار.

منی یاد ائله‌مه،
اؤزگه اول، یاد اول،
اویونجاق اولماسین مکتوبلار باری.
عؤمرونده بیرجه یول
عالی‌جناب اول،
یاندیر خاطیره‌می - او مکتوبلاری...

اوردا اۆرگیمین هارایی، آهی،
قلبیمین اوتانجاق سئوداسی یاتیر.
اوردا وۆقاریمین سؽنما گۆناهی،
کؤورک بیر نغمه‌نین صداسی یاتیر.

داغیلار شؤهرتین دومانی، چنی،
اودار بیر آج بالیق اینجی تک سنی.
یازدیغیم سطیرلر آج توخوم کیمی
بیر گۆن گؤز یاشینی ایچه‌جک سنین.

مکتوبلار ایچینده نه‌ییم-نه‌لریم...
آلوولو سطیرلر گیزلی غم کیمی.
یاندیر مکتوبلاری...
خاطیره‌لریم یانسین،
کۆله دؤنسون قوی کرم کیمی.

سنه اۆمید دولو دیکیلن گؤزلر
یئنه خاطیره‌ده دونوب قالاندیر.
الیم اسه-اسه یازدیغیم سؤزلر
او زامان دۆز ایدی
ایندی یالاندیر...
حیاتین اؤزونده سؽنادیم سنی،
دئمه باهار ایدیم،
ایندیسه قؽشام.
یاخشی کی، نهایت، تانیدیم سنی،
یاخشی کی، عؤمورلوک آلدانمامیشام...