هر طبیبین آجی- آجی پندین، ای بیمار، ائشیت!

جانه ائتدیم درد دل زبتین دن، ای دیلدار، ائشیت!
عندلیبین سرگذشتین، ای گول بیخار، ائشیت!
یوخ دیلیم یالوارماغا ازبس خومار آلوده یم،
ال-آیاغین صدقه سی، ای ساقی خونخوار، ائشیت!
باغریمی قان ائتدی غم، ای یار سنگین دل، اینان
جانیمی یاندیردی هیجر، ای آتشین روخسار، ائشیت!
رحم قیل عشق اهلینه، کس بولهوس دن رغبتین،
گر ائشیتمزسن اونو، باری بونو، ای یار، ائشیت!
ساغر و صهبایه، ظالم، عؤمرولردیر تشنه یم،
بیر زامان اگلن، سؤزوم، ای ابر گؤوهربار، ائشیت!
اؤلدوررسن چونکی سن آخیر منی بیداد ایله،
بیر نفس زینهاریم، ای خونخوار بی زینهار، ائشیت!
چون بو درده اؤز-اؤزون، قؤوسی، سالیبسان من کیمی،
هر طبیبین آجی- آجی پندین، ای بیمار، ائشیت!