منو
توسباغا
باشی قینیندا بیر توسباغایا بنزه‌ییرم
ایسکَنجبین‌له کاهی ایله قیدالانیرام
-یاواشجا دئییم، کیمسه ائشیتمه‌سین
بو گونلر سیرکه- شیره یاشاییشیمین آدی‌دیر.-
اوزوم، داریخقانلیغین اوزونو آغاردیب
و گؤوده‌مین دریسی
کرگدن دریسینین اوزونو...
بو گونلر
اؤز داشیمی، اؤز قابیرقاما چیرپیرام
توسباغالارین سئویشمه‌ییندن بیر شکیل تاپیم دییه
سانال دونیانی الک- فلک ائدیرم
بلکه اونوتدوغومو یئنیدن اؤیرندیم...
بو گونلر
گئجه‌نی گوندوزومه قاتیرام
یازدیغیم آنلار
باکیره دیشی توسباغایا دؤنوشورم
سئویشمه‌میش بویلو قالیرام
بارماقلاریم
یومورتالاریمی لپ‌تابیمین کلاویه‌لرینین اوزه‌رینه دوغور
یومورتالار تیققا- تیق سسینه چاتلاییر
سایسیز- حسابسیز اَتنه‌لر سورونولر عاغلیمدا
سیرایلا دوزولورلر لپ‌تابیمین وُرد صحیفه‌سینه...
اردیبهشت. 1392