منو
یاغیش رقصی
تبریز بیر قوجاق بولوددور
منسه قولوم قولتوغومدا
یئنی‌دن «ساراماگو»نون «کورلوق»وندا گزیرم
یاغیش آلتیندا داریخقانلیقدان سویونماغیم گلیر
ائیواندا، کورلار ایله رقص ائتمه‌ییم گلیر
…آخ!
بیزده هر جور عریانلیق یاساق
عریان ایسلانماق یاساقدان دا یاساق
یاساق یازیلیر «کورلوق»ون یازیلمامیش آغ خط‌لرینده
پنجره‌می اورمو دنیزینین قوراقلیغینا آچیرام
گئجه‌نین قولاغینا قیشقیریرام
هاااااااااای...
ائشیدن وارمی؟
یاغیش رقصینی باشاران وارمی؟
مهر. 1393