یوخو، قاپ قارا بیر کپنکدیر
گئجهنین بئشینده باشیمدان اوچور
بهمنین شاختا- سازاغی
قیشین توفهتوفوو
تبریزین توتسوز، یارپاقسیز فصیلی
یالنیز کؤرپو آلتیندا یاتانلاری
گُور ایچینده ائو قورانلاری دئمیرم
ایپک قوردو بئله بو توفهتوفده
قابیغینا دؤنمهیی گلیر...
ایچیمده بیر خیالباز قادین
قیروولانمیش بو قارانلیقدا
آریلارین بال دامیزدیران دؤشلرینی
قاریشقالارین دؤشلریندهکی تاخیل آنبارلارینی
و میغمیغالارین قانا دولموش دؤشلرینی دوشونور.
قورخمایین!
یوخو باشیمدان اوچسا دا، عاغلیم اوچماییب
سادهجه اینسان ایله حشرهنی توتوشدورماغیم گلیر
انسان آغزیندان سوزولن بال کیمی سؤزلر
تاخیل آنبارلار
قانلی أللر
آه...بو قانلی أللر... بو قانلی أللر... بو قانلی أللر
بو آغ- آپباغ، پامبیق کیمی یومشاق قانلی أللر...
بو قارا نفته یئیریکلهین عاغیللار
آفریقادان توتدو اورتا دوغویاجان
تورپاقلاری چیرکابا بولاشدیریب، قانا بلهشدیردیلر
قارا بایراقلار*
اوزهرینه تانرینین مقدس آدینی یازمیش بو قارا بایراقلاراری قالدیرانلار
بیلکلرینه باغلانمیش سوییس مارکالی ساعاتلارییلا
زامانا ترسه نال چالدیلار
مدرن تویوتالارلا
مدرن سیلاحلارلا
شرقی مفعوللاری
بئش اون شاهییا، جینسل کؤلهلییه ساتدیلار
قیزجیغازلارین بکارتینی بئله بمباردمانلادیلار
و قولچاقلارین گولوشلری
قورخودان دوداقلاریندا سیندی!
آغ سارای قول وئرمیشدی قوللارینا
باکینگهام چرچیلین درسینی أزبرلمیشدی
ایز ایتیرمیشدی هر زامانکی کیمی
باشینی قاتمیشدی اورپا اتفاقیندان گئری چکیلمهیه
مرکل، شرقی مفعول دئیلدی، دوربونو زوم ائلهمیشدی اورتا دوغویا
کرملین روس شووَهنی سالمیشدی
ائلیزه سوسموشدو
واتیکان سوسموشدو
قادینلاری بئش اون شاهییا جینسل کؤلهلییه ساتاندا
تانری بئله سوسموشدو
داعیشین باشینا گؤیدن داش یاغدیرمادی
یئتمیش ایکی میلّتدن توپلانمیش، اردونون بئلیندن ویرمادی...
آخ... بو گئجه یوخو قاپ قارا بیر کپنکدیر،
باشیمدا قاناد چالیر
اونلار، اؤلومه مشغول اولورکن
منسه پیس قوخویان نفت ایله
گول قوخویان قادینلارین اورتاقلیقلارینی آختاریرام
وسوسه...
ائحتیراس...
پارا...
آخ...
آمان بو نفت دوشکونلویو،
قادین دوشکونلویو،
قان دوشکونلویو اولان مودریکلرین عاغلیندان!...
گؤزومو یومورام
چئورهمدهکی قیروولانمیش قارانلیقدان
باشیمداکی عاغیلمدان بئله قورخورام
سوسورام!
اینسان ایله حشرهنی توتوشدورورام
یوخ!
بو بال او بال دئییل
بو تاخیل او تاخیل دئییل
بو قان او قان دئییل...
دان سؤکولوب،
تبریزده زامان وطن ساعاتی ایله ایشلهییر
کپنک، ساچیمین قاراسیندا گیزلهنیر
منسه عاغیلدان- باشدان
قادین قیلیغیندان چیخماغیم
آرییا
قاریشقایا دؤنوشمهییم گلیر
میغمیغا اولوب اینسانلیغی سانجماییم گلیر...
داعیش بایراغی*
بهمن.1395