منو
لیمون حیس‌لرین دوشمانی‌دیر
اوشاقلیغیمدا افطارا ساخلادیغیم یئمک‌لر کیمی
گوندوزومدن بیر پای
یوخومو ایتیردیییم آنی‌لاریما
گئجه‌لریمین یاریسینا ساخلاییرام
چای دمله‌ییرم
دؤرد دانه بادام یئییرم
یولداشلیغی اونودان دئیلم
ایکیسینی سنین آغزینلا یئییرم
- دئمیشدین: بادام بئلی برکیده‌ر-
منسه دئمیشدیم: یهودی‌لره گؤره هارون-ون عصاسی بادام آغاجیندان‌ایدی
تانری عصانین اوزه‌رینده شکوفه ایله فیلیخ بادام گؤیرتدی-
یهودی سؤزونه دیسکینمه، صهیونیست دئمه‌دیم کی!
اوسته‌لیک منیم شعرلریم دیوارسیزدیر، سیچان یوخدور، قولاقلانسین
ایکی لیوان تیلیفلی چای سوزورم
من بیر آزجا دیکتاتورام، خوشلانماسان دا منیم‌له برابر تیلیفلی چای ایچمه‌یه مجبورسان
بیر حالقا تَپ- تَزه لیمونو یاری بؤلوب، بلور لیوانلارین ایچینه سالیرام
چایین رنگی قاچیر
لیمون آلما خاصیتلی دئییل
نه حوّانی جنّتدن آزدیرار نه آدمی یولدان چیخارار
آزمادان، یولدان چیخمادان بیرینجی چایی اؤز آغزیملا ایچیرکن
پاپروزون توستو حالقالارینا دالیرام
آتام دییردی: «پاپروز دئدییین، ایکی چای آراسینداکی پاپروز...»
ایکینجی چایی سنین آغزینلا ایچیب
لیوانلارین ایچینده‌کی تیلیفلی لیمونلارین حالقالارینی بیرلشدیریب یئییرم
آخی دئمیشدین: لیمون حیس‌لرین دوشمانی‌دیر!
اسفند 1395