آنا یئر قوردو

«قادین گولرسه، دونیا گولر!» دئمیشلر

قادین آغلارسا نئجه؟

قادین ییخیلیرسا

قادین یئنیلیرسه نئجه؟

قادین اینسانلیغین آرخا پلانیندا قالیرسا نئجه؟

دونیانین گؤزونو دوشونورم

دونیانین ألینی، آیاغینی

دونیانین دار بوغازینی

دونیانین دوداغینی

دونیانین قوجاغیندا سولموش میموزا گول‌لرینی بئله دوشونورم

بیزلرده هئچ بیر قادینا میموزا تقدیم ائتمزلر

نئجه کی دونیا  زتگین ایله، لوکزامبورگ-ون أته‌یینه بیر اووج قیزیل گول سپمه‌دی

اینان،

اییرمی‌بیرینجی عصرده قادین آغلارسا

دونیا ‌کور گؤزونو بئله قیرپماز

قادین ییخیلیرسا

دونیا أللرینی بئلینه ویریب

آیاغی ایله ییخیلمیش قادینی باسدیرار

قادین یئنیلیرسه

دونیا دار بوغازیندان اودوب، قادینی باغیرساقلارینین پیسلییینه قاریشدیرار

قادین اینسانلیغین آرخا پلانیندا قالیرسا

دونیا دوداغینا اوچوق قوندورماز بئله...

آمما

«قادین گولرسه، دونیا گولر» دئمیش‌لر

دونیانین عاغلینی دوشونورم

باشیمدا بیر سوال یئرقوردو کیمی قیمیلداییر

قادین کیمین اوزونه گولمه‌لیدیر؟

سرمایه‌نین؟

گوجون؟

شهوتین؟

یوخسا ائوینین دؤرد دیوارینا  گولمه‌لیدیر!

یئر قوردولار بئینیمده میتوز تقیسمی‌ایله آرتیر

پروفاز...

متافاز...

آنافاز...

تلوفاز..

و بئینیمده‌کی دونیا

سیتوپلاسمین ایکی‌یه بؤلوندویو کیمی

 ایکی قوطبا بؤلونور.

اؤزومه دئیرم: «بوراخ بو خیال‌بازلیغی!»

باشیمدا قیمیلدایان بو آنا یئر قوردونون أل چکن گونو یوخدور

دوغوردان دا قادین گولرسه، دونیا گولرمی؟!

 

اسفند.1395