یاردن تا سیّد مضطر کیمی دوشدوم جدا

قصد جان ائیلر، او فتان گؤزلرین بیداددیر،
بیر کبوتر قصدینه، گویا ایکی صیاددیر.
اؤلدورور، گاهی دیریلدیر عاشیقی غمزن اوخو،
تورفه ساهیردیر کی، هم جان بخش، هم جلاددیر.
لحظه لحظه سیل اشکیم عالمه طوفان سالیر،
تا غمیندن هر گؤزوم بیر دجلۀ باغداددیر.
باشین اوچون، کسمه مندن ای بت بیدادگر
جور و ظلمون کیم، فرح بخش دل ناشاددیر.
ای مه نامهربان، ائتمم تمنا وصلوی،
بس کی، کؤنلوم محنت هجرانوا معتاددیر.
قیلدی هجران قصد جان، جانانه بیلمز حالیمی،
لطف قیل، ای ناله، بو دم کیم، دم امداددیر.
یاردن تا سیّد مضطر کیمی دوشدوم جدا،
همدمیم افغان، انیسیم ناله و فریاددیر.