سیّد، اول حور وشین وصلین ائدرسن خواهش

گرچی دل صیدینه، ای گول، خط ایله خالین وار،
لیک اوندان بو گؤزل دیر کی، گؤزل حالین وار.
گئنه کیم لر اورگین قان ائده جکسن، ای مه،
بو روخ آل ایله چیخماقدا بو گون آلین وار.
چوخ باخرسان دهن یاره، کؤنول، یوخسا گئنه
مبحث نکتۀ موهومده اشکالین وار.
زاهدا، سن کی، بیلیرسن اؤزوو حال اهلی،
بیر اؤز احوالوی بیلمزسن، عجب حالین وار.
توت کی، ای مرغ دل، اولدون بو قفس دن آزاد،
اوچماغا جنّت کویینه مگر بالین وار؟
آچیرام مصحفی، یوز دفعه، “الیف لام” گلیر،
قامت و زلفده، ای دل، نه گؤزل فالین وار.
سیّد، اول حور وشین وصلین ائدرسن خواهش،
اولماغا جنّته شاییسته نه اعمالین وار؟