سیّدا، یار ائشیدیب نالۀ زاریمی دئدی

قتلیمه میل اگر اول دلبر نوشاد ائیلر،
غم الیندن قوتاریر، کؤنلومو هم شاد ائیلر.
نئچه ایللردی قیلیب سلسلۀ زلفه اسیر،
نه منی اؤلدورور اول سرو، نه آزاد ائیلر.
گر او شیرین لب لعلینی شکربار ائتسه،
گتیریر شوره، جاهان اهلینی فرهاد ائیلر.
ملک الموت اگر غمزنه شاگرد اولسا،
آز زاماندا اونو جان آلماغا اوستاد ائیلر.
آفرین ناوک خونریزوه کیم، سینه مدن
چکمگه جان حزینی، منه امداد ائیلر.
تا کی، ظلمون ائشیدیب ائتمه یه‌لر میل سنه،
سیتمیندن، گؤره هر کیمسنی دل، داد ائیلر.
مئ گولفامه دؤنن اول لب لعلین هوسی،
سنی مئی شوربونه ای موغبچه، معتاد ائیلر.
سیّدا، یار ائشیدیب نالۀ زاریمی دئدی:
بو نه ایتدیر کی، گلیب کوییمه فریاد ائیلر.