سیّدا، گر جانوی جانانه ائتمزسن فدا

جسمدن جان آلماغا گر اولسا فرمانین سنین،
جانه منت دیر اولام، ای دوست، قربانین سنین.
گر تؤکرسن، ای خلیلیم، قانیمی، غم ائتمرم،
غم اودور کیم، گر باتا اول قانه دامانین سنین.
گلمیشم جان وئرمگه، ای شه، مینای کویوه،
قانیمی تؤک جامه کیم، اولسون بو احسانین سنین.
بیر گولوستان دیر سر کویین آچیلمیش گول لری،
قان ایله گولرنگ اولوب گولبرگ خندانین سنین.
کسرت ایچره تاپمیشام من دور کنز وحدتی،
اولموشام هرچند زلفون تک پریشانین سنین.
نفی دن اثباته گل، ای دل، کی خاکه نسّ ائده
قطره قطره حرف ”اله لله” آل قانین سنین.
سیّدا، گر جانوی جانانه ائتمزسن فدا،
راضی اولماز عشقده سندن او جانانین سنین.