اولوب بی نور هجر عارضینده دیدۀ سیّد

گؤزوم سندن سیوا رخساره یه گر باخسا کور اولسون،
دئیم بوندان بتر، وصلیندن ای مهپاره، دور اولسون.
ایلاهی، قانه دؤنسون غیر یادین ایله سه کؤنلوم،
گؤزوم چیخسین، باخا سنسیز، اگر قیلمان و حور اولسون.
گؤزون یادیله کؤنلومده، عجب یوخ، اولماسا عشرت،
نه ممکن دور، گؤزوم، بیمار اولان ائوده سورور اولسون؟
غرور حسن ائدیب، ای میشک خط، مندن کنار اولما،
ندیر نقصان سلیمانه اگر هم بزم مور اولسون.
اولوب بی نور هجر عارضینده دیدۀ سیّد،
اوزوندن دور اولان گؤزده نه ممکن دور کی، نور اولسون!