اول گول آله دئدیم بیر یانیما گل بی رقیب

نوباهار ایامیدیر، من زار قالدیم یارسیز،
هیچ بولبول اولماسین بو فصلده گولزارسیز.
اول گول آله دئدیم بیر یانیما گل بی رقیب،
گولدو کی، ای عاشیق شیدا، گول اولماز خارسیز.
گئتسه شام تیره روشن صبح اولور، لاکین منیم
روزگاریم تار اولور اول ترۀ ترارسیز.
چوخ ائدن بیماره خیدمت، عاقبت بیمار اولور،
لیک کؤنلوم خسته دیر اول نرگس بیمارسیز.
سئیرده اغیاره باخ، اول ماهه اولدو مشتری،
من وبالا دوشموشم اول کوکب سییارسیز.
نکتۀ پنهانی سور لعل لب دلداردن،
ای کؤنول، اولماز دهان یار هیچ اسرارسیز.
زلفونو دایم باسار باغرینا چشمی، وجهی وار،
سیّدا، کج گئتمه کیم، افسونگر اولماز مارسیز.