دئدی لر اؤلدوره جک یار سنی، ای سیّد

سندن اؤترو نئچه مدتدی ملامت چکیرم،
طفلسن، سن نه بیلیرسن کی، نه محنت چکیرم.
چرخ دوارایله یئردن گؤگه واردیر فرقیم،
او چکه بیلمه دی، من بار امانت چکیرم.
ایسته مزسن، دئدیم، ای ماه، غبار قدمین؟
دئدی: روشندی بو، یئردن گؤگه منت چکیرم.
پردۀ چشمیمه ممکندو چکم صورتوی،
مردم دیده روخون گؤرمگه غیرت چکیرم.
ائتدی آیینۀ رخساروی آخر تیره،
چکدیگیم آهلره ایندی خجالت چکیرم.
یار اولوب اؤزگه لره یار، چکیر ذوق و صفا،
دوشموشم من قورو بهتانلارا تؤهمت چکیرم.
دئدی لر اؤلدوره جک یار سنی، ای سیّد،
تانری شاهددی کی، بو خیر ایشه حسرت چکیرم.