گؤگ دن یئره سن ائنمیسن، ای آیۀ رحمت!

بو حسنو لطافتده یقین دیر بشر اولماز،
رخساروا بنزر، فلک اوزره، قمر اولماز.
ای لعلی شکر، چوخ یئمیشم میصر نباتی،
هرگز لب شیرینوه بنزر شکر اولماز.
قددیندی سنین سرو خرامان، زغنین سیب،
اما نه دئیم، سروده هرگز ثمر اولماز.
گؤگ دن یئره سن ائنمیسن، ای آیۀ رحمت!
رخسار لطیفین کیمی گولبرگ تر اولماز.
مژگان اوخون آتسان اگر، ای قاشی کامانیم،
اول کیمدی کی، بو تیر بلایه سپر اولماز.
سارا دیر آدین، ایککی ساچین عنبر سارا،
ساچین کیمی عالمده سنین مشک تر اولماز.
ساچیندا عیاندیر منه طولانی بلا لر،
یوز گئجه دئسم درد دلیم، مختصر اولماز.
سیّد، گئنه اولدون هوس عشق ایله دورپاش،
اشعار لطیفین کیمی دورو گوهر اولماز.