هانسی نین کؤنلونو اول چاه زنخدانه سالیب؟

بو گلن کیمدی کی، یوز ولوه له شیروانه سالیب،
غولغوله، حسنو اونون، عالم امکانه سالیب.
قیزاریب عارض آلی گول تر تک مئی دن،
آچیبان رویینی عشق اهلینی یوز قانه سالیب.
کیمدی بو عارضی خورشید درخشان کی، بو گون
خون لر لعل لبی کوه بدخشانه سالیب.
بو عزیزه نئچه یوسف لر اولوب زار و اسیر،
هانسی نین کؤنلونو اول چاه زنخدانه سالیب؟
دور رویینی توتوب لشکر خط سیهی،
مورلر رخنه، مگر، ملک سلیمانه سالیب!
بونا محمود دئیم، بیلمییرم یا کی، ایاز
جزبۀ عشقینی بو خاطر سلطانه سالیب.
گؤرممیش سیّد سرگشته او شمع حسنو،
بو عجب دیر کی، اؤزون آتش سوزانه سالیب.