اولما یارین، سیّدا، جور وجفاسیندان ملول

اول اوزو خورشید کیم عاشیق لرین جانانیدیر،
گون تکی روشندی کیم، بو خسته جسمین جانیدیر.
ظلمت زلفینده، پنهان، لعلینه میل ائتدی دل،
اول دهان تنگ خیضرین چشمۀ حیوانیدیر.
سرّیمی عالم بیلیر، ای دل، نه پنهان ایلییم،
آشکاره دل آلان اول خندۀ پنهانیدیر.
ای طبیب، ال چک علاجیمدان، منه ائتمه علاج،
خاک کوی دوست کور اولموش گؤزوم درمانیدیر.
نام معشوقی نه حاجت ظاهر ائتمک، ای کؤنول،
ائل بیلیر، عالم بیلیر گولروخ لرین سلطانیدیر.
سینه ده پئیکانوا قیلدیم جگر قانین قیدا،
جانه منت دیر کی، بو جانانیمین مهمانیدیر.
نامه گلدی یاردن، ایستر جسددن جانیمی،
بؤیله ساندیم کی، حقین گؤگ دن گلن فرمانیدیر.
اولما یارین، سیّدا، جور وجفاسیندان ملول،
عاشیقه جور وجفاسی دلبرین احسانیدیر.