سن ده گئدیبن آغلا اؤز احوالوا، سیّد

چشمینده غضب یوخسا دل زاریم اوچون دور؟
قهری او طبیبین دل بیماریم اوچون دور؟
شادم کی، سالیر غیر منی یادوا هردم،
هرچند کی، یاد ائتمگی آزاریم اوچون دور.
روسوالیغیم اولدو سبب شهرت دلدار،
ترک وطن ائتدیمسه اگر، یاریم اوچون دور.
هر گئجه فغانیم یئتیشیر گؤگده هلاله،
بو ناله‌لر اول اختر سییاریم اوچون دور.
سن ده گئدیبن آغلا اؤز احوالوا، سیّد،
فریاد و فغانیم منیم اؤز یاریم اوچون دور.