گزمنم کوچه‌لری هئیوره بوندان سونرا

وئرمنم کؤنلومو بیر دلبره بوندان سونرا،
اولمانام عاشیق او سیمین بره بوندان سونرا.
آلدی ایمانیمی الدن، منی بی دین ائله دی،
آشنا اولمانام اول کافره بوندان سونرا.
اوخشاییر ماه فلک چونکی عذار یاره،
باخمانام من بو مه انوره بوندان سونرا.
باده نین لعل لب دلبره چون نسبتی وار،
تؤکمنم بادنی من ساغره بوندان سونرا.
عنبرین زلفوون اول قدر ضیانین دئیرم،
کیمسه رغبت ائلمز عنبره بوندان سونرا.
دخی اول سروقدین کویینه جنّت دئیبن
گزمنم کوچه‌لری هئیوره بوندان سونرا.
ائتمنم زلفوون اوصافینی، شاعر دئمه سین
او پری سیّد غم پروره بوندان سونرا.