بونجا کیم سلسلۀ زلفووی ایستر، سیّد

نئیلییم، مجلس آرا اولسا دا اغیار، اولسون،
تک او گول دن منه بیر فرصت دیدار اولسون.
غایت شوقیمی گؤر یاره کی، هنگام ویدا
رشک دن من دئیه بیلمم کی، خدا یار اولسون.
هانی، ای روح روان، غیرت معشوقلیگین،
قویما کیم، غیر من زاره خریدار اولسون.
بیر ایاغ ایله منیم کؤنلومو آلدین اله سن،
گؤروم، ای ساقی گول چهره، الین وار اولسون!
تاکی، سرمست دیر عشق اهلینه لطف ائیلر یار،
ساقیا، قویما او بی مهری کی، هوشیار اولسون.
اورگیم قانه دؤنوب، قوت تقریریم یوخ،
یوخدور احوالیما بیر کس کی، خبردار اولسون.
بونجا کیم سلسلۀ زلفووی ایستر، سیّد،
گؤروم اول دامده بوندان دا گرفتار اولسون.