سیّدا، چکمنم اول دور مخالف غمینی

شیوه سی گاه غضب، گه رویشی ناز اولسون،
تکی بزمیمده منیم بیر بت طناز اولسون.
خلق هرچند دئیر بیر گول ایله یاز اولماز،
چاغیرین اول گولو کیم، مجلسیمیز یاز اولسون.
طاییر کؤنلومو صید ائتدی غزال چشمین،
باوریم یوخ بو جاهاندا بئله شاهباز اولسون.
اؤلدور، ای قاشی کمان، عاشیقی مین ذلت ایله،
تا گوروه شهدا ایچره سرفراز اولسون.
موستجاب اولدو دعامیز کی، نگاریم گلدی،
در میخانه گرک دیر بو زامان باز اولسون.
دئمنم باده ایله ائت منی سیراب، خدا،
باری، چوخ اولماسا دا قسمتیمیز آز اولسون.
سیّدا، چکمنم اول دور مخالف غمینی،
تکی اول دلبر خوش لهجه ساز اولسون.