سیّد اول زلفو روخوندن کی، حکایه سؤیلر

کیم کی، ایستر اؤزونو سرور ایام ائله سین،
در میخانه نی اؤپسون، طلب جام ائله سین.
آب کوثرده منیم هر نه نصیبیم وارسا،
دؤندریب ربیم اونو بادۀ گولفام ائله سین.
یار گلدی، هامی اؤز دردینه مشغول اولدو،
قالمادی کیمسه کی، احوالیما انجام ائله سین.
سن نه کوتاه سن، ای شام وصال دلبر،
حق منیم عمرومو کسّین، سنه انعام ائله سین.
زلفو خطین گتیریر عارضینه جانانین،
کافر ایستر عجبا، کافری اسلام ائله سین؟
اولسا ناکاملیغیم گر او پری نین کامی،
دیل دیوانمی حق دهرده ناکام ائله سین.
سیّد اول زلفو روخوندن کی، حکایه سؤیلر،
ایستییر کیم، گونون اول وجه ایله آخشام ائله سین.