بولبول سبب سیز اولمادی گولزاره آشنا

گول غنچه لیکده گرچی اولور خاره آشنا،
آچسا نقابینی اولور اغیاره آشنا.
بیگانه لرله چونکی اولور آشنا، کؤنول،
کاش اولمایایدیم اول گول بی خاره آشنا.
گویا باشیندا بیر گول آلین هواسی وار،
بولبول سبب سیز اولمادی گولزاره آشنا.
تؤکدو، داغیتدی عارضه زلف سیاهینی،
ائتدی زمانه ده گونومو قاره آشنا.
گؤردوم رقیبه مایل اولان التفاطینی،
ساندیم رقیب کیم، اولا جاق یاره آشنا.
جنّت حرامیم اولسون اگر شکوه ایله سم،
اؤز خواهشیمله یاخسا منی ناره آشنا.
لاکین رقیب پندین آلیب، سیّدا، منیم
ائتدی دل حزینیمی صدپاره آشنا.