کؤنولده زخم نهان اولماسایدی، ای سیّد

اؤزومله اولسا ایدی، من جاهانه گلمز ایدیم،
گتیردی لر منی، اما من آنه گلمز ایدیم.
بو دام عشقه منی سالدی دانۀ خالین،
فیریب وئرمه سه ایدی او دانه، گلمز ایدیم.
گؤرونمه صیدی اگر هر مکاندا نور روخون،
فضای قدسو قویوب، بو مکانه گلمز ایدیم.
دهان یاردن اولسایدی بیر اثر ظاهر،
یقینی ترک قیلیب، من گمانا گلمز ایدیم.
قدیمی ائیلر ایدیم درد ایله غمینده کمان،
خدنگ چشموه، بیلسم، نشانه گلمز ایدیم.
بهانه ایله یئترمیش وصاله عاشیق لر،
و گر بیلئیدیم اونو، بی بهانه گلمز ایدیم.
اولایدی ذاتیم ازل دن اگر زر خالص،
یانیب بو بوته آرا ایمتاحانه گلمز ایدیم.
بو ذوق دن ائلمه، باغبان، منی مایوس،
گولوم اولایدی اگر، گولسیتانه گلمز ایدیم.
کؤنولده زخم نهان اولماسایدی، ای سیّد،
امید مرحم ایله من فغانه گلمز ایدیم.