ضیا شمس تک دوشدوم او کوی دلبره، سیّد

ازلدن چونکی من مئیخوارۀ بزم الست اولدوم،
ایچیب وحدت شرابیندان بئله مخمور و مست اولدوم.
زیبس کی، یاغدی داش لار باشیما بو چرخ مینادن،
درست ایکن پوزولدوم، ساغر مئی تک شکست اولدوم.
تجّلای جمالین مسجید و میخانه ده گؤردوم،
گهی مسجیدده عابد، دئیرده گه بت پرست اولدوم.
ایاغ آلدیم اله، باشیما چکدیم ناز ایله ساغر،
آیاغین صدقه سی، ساقی، کی من بی پا و دست اولدوم.
نشیمن ائتمیش ایکن قاف عزلت اوزره عنقا تک،
هوای دانۀ خالینلا دامه پای بست اولدوم.
عدم معموره سینده راحت ایکن عین وحدتله،
دوشوب عین زواله عالم کسرتده هست اولدوم.
ضیا شمس تک دوشدوم او کوی دلبره، سیّد،
یئتیشدیم رتبۀ اولیایه، فکر ائتمه کی، پست اولدوم.