چوخ باخردیم دهنی یاره، نهانی، هردم

بو گئجه بیر مه ایله اوج ثریاده ایدیم،
وصل معراجی ایله ارش معلاده ایدیم.
یوخو احوالی گلیر ایندی منه شام وصال،
حالت لفظه ده، یا بو گئجه رؤیاده ایدیم.
لب جامه یئتیشیردی، لب لعلی او گولون،
من لب جامی اؤپوب اؤزگه تمناده ایدیم.
ساغریم جام قواریر، شرابیم کوثر،
همدمیم حور، اؤزوم جنّت ماواده ایدیم.
یار آچمیشدی لطافتله بو شب سینه سینی،
غرق نور اولموش ایدیم، سینۀ سیناده ایدیم.
نقش دن پئی آپاریردیم بو گئجه نقاشه،
سئیر قدرت ائله‌ییب اؤزگه تاماشاده ایدیم.
حلقۀ زلفده رخسار منیرین گؤروبن،
ناظر ماه منور شب یئلداده ایدیم.
دهنین آچماغا اول یار قیلیردیم تدبیر،
صبح اولونجا هوس کشف معماده ایدیم.
چوخ باخردیم دهنی یاره، نهانی، هردم،
چارۀ فکر دل سیّد دلداده ایدیم.