سیّد شکایت ائیله سه سندن عجب دئگیل

یاریمی یار ائیله دین اغیاره، ای فلک،
ائتدین گولو نصیب گئنه خاره، ای فلک.
سالدین شعاع مهروی رخسار یاریما،
ائتدین زمانه ده گونومو قاره، ای فلک.
هر نصف شبده سنده دئگیل دیر ستاره لر؟
آچدین او ماه دیدۀ نظاره، ای فلک.
سالدین سفر هاواسینا یار عزیزیمی،
ائتدین او ماه ثابتی سیّاره، ای فلک.
یاخدین فراق یارایله کؤنلومو، حقی وار
آهیم شراری یاخسا سنی ناره، ای فلک.
بیدردلرده درد گؤروب چاره ائیله دین،
یوخدور بو درد هجره مگر چاره، ای فلک؟
سیّد شکایت ائیله سه سندن عجب دئگیل،
یاریمی یار ائیله دین اغیاره، ای فلک.