سیّدا، جانیمی نذر ائتمیشم اول قاصده کیم

هانی بیر کس کی، یئتیرسین منه جانان خبرین،
سؤیله سین بولبول اوچون باغ و گولوستان خبرین.
ای صبا، ای سنه بو روح روانیم قربان،
قومر زاره گتیر سرو خرامان خبرین.
ظلمت غمده اسکندر کیمی قالدیم حیران،
یئتیر ای خیضر، منه چشمۀ حیوان خبرین.
ای کبوتر، آپاریب نامۀ درد دلیمی،
هم من زاره گتیر اول مه تابان خبرین.
هانی بیر قاصد فرخ سییر و عیسی دم –
کی، یئتیرسین تن بی روحوموزا جان خبرین.
جان شیرین منه تلخ اولدو غم هجراندان،
وئرمه‌دی کیمسنه اول خسرو خوبان خبرین.
سیّدا، جانیمی نذر ائتمیشم اول قاصده کیم،
وئره من عاشیق دل خسته یه جانان خبرین*.
—————————————————-
* غزل سلطان چنگی نین بیر غزلینه جاواب دیر.