سن اولدون سیّدین لطفونده ظاهر

عیان گؤزله باخان شخصه نهانسان،
نهان گؤزله باخان ذاته عیانسان.
دئسم پنهانسن، هر یان عیانسان،
دئسم کی، من عیانسن، یوخ نهانسان.
منور ائتمیسن جمله جاهانی،
مگر سن آفتاب آسمانسان؟
اؤزون هم راه سن، هم زاهزن سن،
اؤزون هم دزدسن، هم پاسبانسان.
آدین دیر زر و نافع، ای نگاریم،
گهی عشاقه سود و گه زیانسان.
سنینلن دیر خزانیم، هم باهاریم،
ولی سن نه باهار و نه خزانسان.
یئله وئردین شمعم تار زلفون،
نسیمی ائیلدین عنبرفشان سن.
سن اولدون سیّدین لطفونده ظاهر،
عیان اولدون کی، سن گنج نهانسان.